J2主持文頌男專訪｜患罕見瘤宣告治療無效父因情婦拋妻棄子心痛堅強媽媽為方便照顧轉返通宵工

J2節目《不正常愛情研究所》主持文頌男（Koba）去年12月公開患罕見的尤文氏肉瘤（Ewing’s Sarcoma），至今全面停工大半年，無奈經歷五次化療後，上月宣告治療無效，椎間近盤骨的惡性腫瘤疑有增大跡象。

面對痛症日夜煎熬、藥物副作用嚴重影響生活，正等待下階段治療的他坦言度日如年，對前路感到徬徨，但仍會積極對抗病魔。回想大學時期曾因情緒抑鬱而想過輕生，經歷大病後內心更強大的文頌男豁達地說：「有咩重要得過你就嚟要死？以前好關注或者為啲咩同人嘈，而家都覺得好無謂、好少事，最緊要自己活得舒服、開心。」

相關閱讀：J2患癌主持文頌男完成化療 撰千字文交代病況：活得好冇尊嚴[1]

文頌男出關回公司談抗癌：

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

文頌男零生產嘆冇生存意義

由於腫瘤壓住椎間神經，文頌男試過下半身持續劇痛30多小時，經化療後本來痛症大大下降，惜後來痛症再次，現時需長期服藥舒緩痛楚。「10分滿分嘅話有8、9分痛，係好多種唔同嘅痛夾埋，譬如放射痛、俾針拮及火燒嘅感覺，主要由大髀到膝頭後面，而家就算食藥都Keep住2、3分痛，間中會突然持續兩個鐘劇痛，痛到意識模糊。」

然而化療與止痛藥的副作用卻對生活造成影響，文頌男指因食嗎啡致記憶變差、嘔吐，最難受是便秘同時出現腹瀉感，大半年來只能長留家中養病，「食瞓屙好似好簡單嘅事，但對我嚟講係好難解決。開始覺得咁樣生活好冇意義，唔可以工作、社交，但呢個年紀係應該好多生產力，我就諗，究竟浪費啲時間喺度做乜？不如唔好再生存落去喇。」幸他很快便打消負面想法，除家人和朋友的支持外，為自己生存亦成為他最大動力，「只要Keep住生存，我就要努力去對抗呢樣嘢，盡量令自己活得舒服啲，希望自己可以繼續活落去，好番之後做到好多唔同嘅嘢，呢個先係最大嘅信念。」

文頌男活在當下向母表愛意

言談間文頌男一直表現堅強，惟提及家人即難掩情緒，數度落下男兒淚。談到成長路上歷盡坎坷，12歲時父親為菲律賓情婦拋妻棄子，更留下大筆債務，文媽媽惟有密密做獨力養大一對子女，終於捱到囝囝取得藝術管理及藝術教育雙學士資格。文頌男畢業後還加入夢想行業，惜不久再次遇上人生重大難關，就是病魔來襲。

年過60的文媽媽為方便照顧病兒，索性辭去日間工作，晚上8時至清晨6時則做清潔工幫補家計，文頌男嘆道：「我冇工作仲要佢照顧我，自己都好愧疚。」昔日覺得一切都是理所當然，一場大病令文頌男頓覺，家人和朋友無私付出的可貴，亦真正領悟到「活在當下」。他由從前不敢表達愛意，到現在逐漸放低「包袱」擁抱身邊人，說罷他忍不住淚流如下：「有時見阿媽幫我做啲嘢，我會同佢講『媽咪，我好愛你』，以前好少表達呢樣嘢，可能我驚自己時間唔係好多，就算朋友，以前好多嘢都覺得好尷尬唔應該講，而家諗到想講咩就講咩，其實你愛佢咪講出嚟囉。」

文頌男公開人生願望清單：

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

文頌男最牽掛竟不是家人？

「有時諗到自己未必治療成功，有一日離開呢度的話，我最擔心嘅唔係屋企人，反而係朋友。」文頌男說。由於自幼與媽媽相依為命，兩母子關係密切，加上早年踏入社會幫手還清債務，目前經濟狀況尚算穩定下來，因此他認為家庭方面可說是無憾：「如果我離開咗都有部分錢留畀阿媽，佢一直都想退休後返泰國住，喺泰國鄉下啲嘅地方需要用嘅唔多，應該都夠佢生活，所以唔算好擔心。」

不過，倒是一班「死黨」最令文頌男牽掛，「因為Best friend好依賴我，好擔心我唔喺度佢點算呢？冇人可以睇住佢、畀到情緒Support佢哋。我都想同佢哋做好多嘢，可能一齊拍攝，呢個年紀應該喺工作上可以同佢哋Achieve（實現）好多嘢，但我做唔到。」人生無常，他寄語年輕一輩努力實踐夢想，「如果好似我咁，時間無多，你就會發現所有外來壓力同聲音都唔重要，有咩想做、想講就唔好再拖，要投入去做，只要Keep住熱誠努力做，係一定有回報同進步。」

文頌男積極抗癌答謝網民

接下來，文頌男將接受放射治療（俗稱電療），預料一、兩個月完成約30次療程，屆時視乎腫瘤大小及醫生評估，再決定是否做切除手術。問可有能力應付龐大的醫藥費？他指，由於要定期照PET Scan、CT及MRI等，一般在公立醫院排期3至4星期，照完要再等半年才出報告，故醫生建議找私家醫院或體檢中心做，惟費用相對較高，每個項目平均逾千元至萬元不等，幸早前獲熱心網民捐款紓解燃眉之急。文頌男哽咽說：「老實講並唔算多，唔知可以撐幾耐，但真係好多謝佢哋，大家萍水相逢，甚至完全唔認識我都捐錢，我都唔知點多謝佢哋，因為呢啲款項對我嚟講好重要。」

到訪問尾聲，雖感前路茫茫，但文頌男仍樂觀為自己打氣：「無論遇到咩難過嘅事、嚟緊有啲咩困難或障礙，我都要努力面對，唔可以放棄，我會堅持，我會有更大嘅勇氣去面對所有事情。」語畢他深呼吸一口氣堅定地說：「我一定會好番㗎！」文頌男，加油！

文頌男更多靚仔相：

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

文頌男專訪後記：享受鎂光燈恨與女神合作

為免感染病菌加上體力不足，除了到醫院覆診外，文頌男已兩個月沒外出見朋友，日前他趁精神稍好在老友Dean攙扶下，從屯門寓所乘車往YouTube頻道「閃芒」辦公室，其間以自備咕𠱸墊住坐。回到熟悉的工作環境，看到昔日朝夕相對的面孔，文頌男心情輕鬆愉快得多，還雀躍向鏡頭展示過去兩年的心血，包括自購戲服、DIY街訪道具及巨型月曆等，全都滿載回憶。

說到人生清單，文頌男稱以另一網台「小薯茄」為目標，盼「閃芒」能吸納更多訂閱、規模越做越大：「我好想返工，希望自己組織更多唔同類型嘅節目。」大學時期曾參演音樂劇的他亦坦言享受幕前工作，最想拍電影及電視劇，「如果有機會同Stephy（鄧麗欣）做對手戲就好嘞，佢係我由細睇到大嘅女神，仲有好多天王巨星周潤發、梁朝偉、劉青雲等，以前睇《無間道》都會幻想自己係『砰砰砰』俾人打死啲𡃁，哈哈。」

撰文：黎寶倫

攝影：鄧國良

其他文章：

J2患癌主持再現幕前！身形消瘦依然活躍 食嗎啡試忍痛試鏡扮正常[2]

J2文頌男自揭坎坷命運被父親拋棄變街童 患罕見癌症心酸哭訴：好慘[3]

J2患癌主持文頌男自揭變「無眉男」 本周最後一次化療精神轉差：感覺就嚟死[4]

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF[5]

想睇更多精彩內容，請立即瀏覽「區區有申訴」活動專頁，https://bit.ly/41hgS9E[6]

References

J2患癌主持文頌男完成化療 撰千字文交代病況：活得好冇尊嚴 (www.stheadline.com) J2患癌主持再現幕前！身形消瘦依然活躍 食嗎啡試忍痛試鏡扮正常 (www.stheadline.com) J2文頌男自揭坎坷命運被父親拋棄變街童 患罕見癌症心酸哭訴：好慘 (www.stheadline.com) J2患癌主持文頌男自揭變「無眉男」 本周最後一次化療精神轉差：感覺就嚟死 (www.stheadline.com) https://bit.ly/3uJ3yyF (docs.google.com) https://bit.ly/41hgS9E (www.stheadline.com)