最高票房女導演賈玲癲減50KG 新片造型洩漏Del唔切| on.cc 東網

賈玲（右）憑《你好，李煥英》，一度膺全球最高票房女導演。賈玲一直都係人群中嘅螢火蟲，體形出眾。一口氣減咗50KG，癲！有指賈玲瘦身圖係「偷跑物料」，被競爭者公開。唔知會唔會影響佢新片定檔。

憑自編自導自演電影《你好，李煥英》爆紅嘅內地演員賈玲，當年曾膺全球最高票房女導演，《你》片更獲荷里活重拍，威盡全球。去年佢收埋自己全年，近日佢同《你》女主角、好友張小斐主演嘅新片《熱辣滾燙》劇照忽曝光，網友驚見本身出名圓潤有肉地嘅賈玲，搖身一變微胖女神，癲減50KG（約110磅），即令新相登上熱搜，網友個個嘖嘖稱奇！

不過好多內地業內人直都指出，今次賈玲瘦身圖疑似係「偷跑物料」，估計係有人畀投資方率先睇片時被洩露，更疑係電影圈春檔競爭嘅犧牲品。本來賈玲消失大眾足足一年，做好晒保秘功夫，有指佢打算春晚當日現身驚艷露面，仲可以配合埋《熱》宣傳，本身電影最大賣點就係佢瘦咗幾多，結果依家被洩漏造型全打亂，如今片方花錢撤熱搜、刪劇照都冇用，分分鐘影響下周二開始嘅新春檔定檔計劃。

東網網站 : https://on.cc/東網Facebook專頁 : https://www.facebook.com/onccnews/[1][2]

References

https://on.cc/ (on.cc) https://www.facebook.com/onccnews/ (www.facebook.com)